Գրիգորյանը չմասնակցելով ՍԴ նիստերին՝ ստանում է 793․ 000 աշխատավարձ, 240 լիտր բենզինի կտրոն

Սահմանադրական դատարանի դատավոր Վահե Գրիգորյանը, պաշտոնը ստանձնելուց ի վեր, որևէ նիստի չի մասնակցել, Aysor.am-ի գրավոր հարցմանն ի պատասխան՝ արձագանքել են ՀՀ Սահմանադրական դատարանից։

Ըստ ՍԴ-ի՝ լրատվականին տրամադրած պատասխանի՝ «Սահմանադրական դատարանի դատավորների աշխատավարձերին առնչվող իրավահարաբերությունները կարգավորվում են «Պետական պաշտոններ զբաղեցնող անձանց վարձատրության մասին» օրենքով, որի կարգավորումների համաձայն՝ Վահե Գրիգորյանին յուրաքանչյուր ամսվա համար հաշվարկված աշխատավարձի չափը (հիմնական աշխատավարձ և լրացուցիչ՝ դատավորի պաշտոնում աշխատանքային ստաժի համար օրենքով սահմանված հավելավճար) կազմում է 793 հազար 680 դրամ»։

Վահե Գրիգորյանին տրամադրվել է պարգևատրում 4 անգամ։

«Սահմանադրական դատարանի դատավորի պաշտոնը ստանձնելուց ի վեր՝ Վահե Գրիգորյանը չի մասնակցել որևէ նիստի, վերջինը որևէ գործով չի հանդիսացել զեկուցող դատավոր։ Հարգելիության վերաբերյալ որևէ տեղեկատվություն չի ներկայացվել նրա կողմից», - ասված է ՍԴ պատասխանում։

Պաշտոնը ստանձնելուց հետո Վահե Գրիգորյանին տրամադրվել է նաև ծառայողական մեքենա (Hyundai Elantra), որը որոշակի ժամանակ անց փոխարինվել է մեկ այլ մեքենայով՝ վերանորոգման անհրաժեշտություն առաջանալու պատճառով, ինչպես նաև՝ մեքենայի համար նախատեսված 240 լիտր բենզինի կտրոն՝ յուրաքանչյուր ամսվա կտրվածքով։