Հայերի կողմից` Վոլֆգանգ Ֆոգելի հիշատակին նվիրված խաչքարը կոտրել են
Վանդալիզմի ակտ է տեղի ունեցել գերմանական Էրլանգեն քաղաքում: Վանդալիզմը Կաթոլիկ եկեղեցու բակում տեղադրված խաչքարի նկատմամբ է իրականացվել: Խաչքարը տեղադրվել էր 2017 թվականին մահացած գերմանացի քաղաքական գործիչ, Սոցիալ-դեմոկրատական կուսակցության անդամ Վոլֆգանգ Ֆոգելի հիշատակին:
Ինչպես տեղեկացրել է Nordbayern պարբերականը, եկեղեցու աշխատակիցները սև մարմարից պատրաստված խաչքարը առավոտյան տեսել են տապալված և մեջտեղից կոտրված:
Գերմանացի գործչի հիշատակին խաչքարը տեղադրել էր տեղի «Hajastan-Armenienhilfe» հայկական կազմակերպությունը: Խաչքարի վրա գրված են Ֆոգելի անուն-ազգանունը և ծննդյան ու մահվան տարեթվերը (1950-2017թթ.): Ինչպես նշել է տեղի լրատվամիջոցներից մեկը, Ֆոգելը աչքի է ընկել հայամետ դիրքորոշմամբ:
