Կնոջն ու հարևանին դանակահարած տղամարդը ձերբակալվել է
Սեպտեմբերի 14-ին՝ կեսգիշերն անց, օպերատիվ կառավարման կենտրոնից ոստիկանության Նոր Նորքի բաժնում հաղորդում է ստացվել, որ Ավանի, Սայաթ-Նովա թաղամասի բնակարաններից մեկում ամուսինը դանակահարել է կնոջը:
Դեպքի վայր մեկնած ոստիկանության Ավանի բաժանմունքի քրեական հետախույզները, ՊՊԾ գնդի ծառայողների հետ համատեղ պարզել են, որ րոպեներ առաջ, վիճաբանության ժամանակ, նշված բնակարանի 31-ամյա բնակիչը դանակահարել է նույն հասցեում ապրող իր կնոջը և 44-ամյա հարևանին:
ՀՀ ոստիկանության լրատվական ծառայության փոխանցմամբ՝ տուժողները կրծքավանդակի կտրած-ծակած վերքերով տեղափոխվել են հիվանդանոց: Ըստ բժշկի տեղեկանքի՝ նրանք ի վիճակի չեն եղել բացատրություն տալու:
Հարուցվել է քրեական գործ:
31-ամյա տղամարդը դեպքի վայրից բերման է ենթարկվել և ձերբակալվել: Նշանակվել է դատաբժշկական փորձաքննություն:
Նախաքննությունը շարունակվում է:
