«Հասանք Մեղրի և Ագարակ». ՀՖՖ-ն գնդակներ և մարզագույք է նվիրել
Հայաստանի ֆուտբոլի ֆեդերացիան շարունակում է մարզերում ֆուտբոլային կյանքն ակտիվացնելուն ուղղված քաղաքականությունը, որի իրականացման քայլերից մեկը մարզային համայնքների մանկապատանեկան թիմերին նյութական և մեթոդական օժանդակության ցուցաբերումն է: Այս մասին հայտնում է ՀՖՖ նախագահի խորհրդական Զոհրապ Եգանյանը:
Այսօր ՀՖՖ նախագահի խորհրդական Զոհրապ Եգանյանն այցելել է Սյունիքի մարզի Մեղրի խոշորացված համայնքի Մեղրի և Ագարակ քաղաքներ, որտեղ հանդիպումներ է ունեցել տեղի մանկապատանեկան թիմերի մարզիչների և սաների հետ: Զ.Եգանյանը մասնավորապես նշել է, որ ՀՖՖ նախագահի ամենօրյա ուշադրության կենտրոնում շարունակում է մնալ մարզերում ֆուտբոլով զբաղվելու պայմաններ ստեղծելու հարցը՝ որպես այդ ուղղությամբ կատարված գործուն քայլ մատնանշելով Վայոց ձորի և Գեղարքունիքի մարզերում ավարտին հասցվող 25 խաղադաշտի կառուցման փաստը:
Լուսանկարները՝ Զոհրապ Եգանյանի ՖԲ էջի:
