«Դոն Պիպոն» չի ընդունել առաջադրված մեղադրանքը. մեկնարկել է առևանգման գործով առաջին դատական նիստը
Արմավիրի մարզի ընդհանուր իրավասության դատարանում՝ դատավոր Հրաչիկ Սարգսյանի նախագահությամբ մեկնարկեց Դոն Պիպո անունով հայտնի Արթուր Ասատրյանի գործով առաջին դատական նիստը։ NEWS.am–ի լրագրողը հայտնում է, որ Դոն Պիպոն ներկայացել է դատարան։ Դատարան են բերվել նաև այս գործով տուժողները, որոնք ներկայաումս այլ քրեկաան գործով գտնվում են կալանքի տակ։
Համաձայն մեղադրական եզրակացության՝ Արթուր Ասատրյանը 2017թ. մայիսի 20-ին կազմակերպել եւ ղեկավարել է նախնական համաձայնությանբ գործող մի խումբ անձանց ներգրավմամբ, որպես զենք օգտագործվող առարկաների գործադրմամբ երեք անձանց՝ Վազգեն Ղազախեցյանի, Արտակ Այվազյանի եւ Արկադի Քոչինյանի առեւանգումը, որը զուգորդվել է վերջին երկուսի առողջության համար վտանգավոր բռնություն գործադրելով: Հիշյալ անձանց վերաբերյալ գործը ներկայումս քննվում է դատարանում. նրանք մեղադրվում են Զոհրաբ Ղումաշյանի կողմից ստացված պատվերով, Արթուր Ասատրյանին, «օրենքով գող» Օշականցի Գևորիկ մականունով հայտնի Գևորգ Մելիքյանին և «Զապ» մականունով հայտնի Անդրանիկ Սողոյանի սպանության նախապատրաստությանն ուղղված գործողություններ կատարելու համար։
Արմավիրի մարզի ընդհանուր իրավասության դատարանի դատավոր Հրաչիկ Սարգսյանը որոշում կայացրեց թույլատրել Դոն Պիպո անունով հայտնի Արթուր Ասատրյանին բուժման նպատակով մեկ ամսով բացակայել հանրապետությունից։ Դատական նիստի ընթացքում Արթուր Ասատրյանը չի ընդունել առաջադրված մեղադրանքը։
Հիշեցնենք, որ Արթուր Ասատրյանը կալանավորվել էր 2018թ. հունիսի 19-ին: Սեպտեմբերի 20-ին դատարանի որոշմամբ փոխվել էր Ասատրյանի խափանման միջոց կալանավորումը. նա 50 միլիոն դրամ գրավի կիրառմամբ ազատ էր արձակվել կալանքից։
Լուսանկարը՝ NEWS.am
