«Իմ քայլը» կզբաղվի Երևանում ժամանցի վայրերի և շինարարության աղմուկի կարգավորման հարցերով

Երևանում ժամանցի վայրերի և շինարարության աղմուկի կարգավորման նկատառումներով ավագանու «Իմ քայլը» խմբակցությունն առաջարկում է այս հարցում ավագանուն տալ որոշ լիազորություններ: Այս մասին իր ֆեյսբուքյան էջում գրել է խմբակցության անդամ Գայանե Մելքոմ Մելքոմյանը։

«Մասնավորապես` սահմանելու առևտրի և ծառայությունների, ինչպես կառուցապատման օբյեկտներում լռությունն ապահովելու օրերը և ժամերը` ըստ դրանց գտնվելու վայրերի: Առաջարկում ենք նաև ավագանուն տալ նույն լիազորությունը փողոցային երաժիշտների կողմից լռությունն ապահովելու ժամեր սահմանելու համար: Այս լիազորությունները ավագանուն թույլ կտան` ըստ գոտիների սահմանել ճկուն ռեժիմներ: Օրինակ` բնակելի շենքերում և դրանց մոտակայքում աղմուկի թույլատրելի ժամերը սահմանափակելու, իսկ դրանցից հեռու գտնվողներինը` ավելի ազատ թողնելու, կամ` նկատի ունենալով թաղամասը և այլ առանձնահատկություններ», – գրել է ավագանու անդամը։