ՏԵՍԱՆՅՈՒԹ. Ֆելիքս Ցոլակյանը տեսակցել է հրդեհից տուժած փրկարարներին

ԱԻ նախարար Ֆելիքս Ցոլակյանն այցելել է Լոռու մարզ՝ տեղում ծանոթանալու Թումանյան կայարանում բեռնատար գնացքի շուրջ ստեղծված իրավիճակին: Դեպքի վայրում նախարարին դիմավորել է «Հարավկովկասյան երկաթուղի» ՓԲԸ-ի գլխավոր տնօրեն Սերգեյ Վալկոն, որը Ֆելիքս Ցոլակյանին շնորհակալություն է հայտնել հրշեջ-փրկարարների անձնվեր աշխատանքի շնորհիվ հնարավոր պայթյունից խուսափելու համար եւ հավաստիացրել, որ առավելագույն կարճ ժամանակահատվածում կվերացվեն վթարի հետեւանքները:

ԱԻ նախարարը հանձնարարել է աշխատակիցներին շարունակել հնարավոր բոլոր միջոցներով օժանդակել վթարավերականգնողական աշխատանքներին:

Հիշեցնենք, որ Վանաձոր-Ալավերդի ավտոճանապարհի 10-րդ կիլոմետրին հրդեհաշիջմանն օգնության շտապող մեքենան գլորվել է ձորը եւ վնասվածքներ են ստացել ԱԻ երկու աշխատակիցներ: Նախարարն այցելել է բուժմիավորում՝ հիվանդներին տեսակցելու: Լոռու մարզպետ Անդրեյ Ղուկասյանի ուղեկցությամբ Ֆելիքս Ցոլակյանը հանդիպել է մարտական հաշվարկի վարորդ Ահարոն Սահակյանին, ով մանրամասն ներկայացրել է կատարվածը:

Նախարարը նշել է, որ Ահարոն Սահակյանն Աստծո նախախնամությամբ է փրկվել, եւ ուրեմն նրա կյանքում այսուհետ ամեն ինչ լավ է լինելու:

Տուժած հրշեջ-փրկարար Սիմոն Այվազյանին այդ պահին վիրահատում էին, նախարարը հանդիպել է Սիմոնի հարազատներին եւ հուսադրել, որ զինվեն լավատեսությամբ եւ հրշեջ-փրկարարին արժանի հաստատակամությամբ: