Վենսը հայտարարել է, որ Իրանի կառավարության ներսում առկա պառակտումը բարդացնում է բանակցությունները

ԱՄՆ փոխնախագահ Ջեյ Դի Վենսը հայտարարել է, որ Թեհրանի հետ բանակցությունները դժվար են ընթանում, քանի որ Իրանի կառավարության ներսում առկա է պառակտում։ Այդ մասին նա ասել է Fox News հեռուստաալիքին տված հարցազրույցում։

«Իրականությունն այն է, որ, նախ, իրանցիները չափազանց բարդ բանակցողներ են»,- ասել է Վենսը։

Նրա խոսքով՝ Իրանի պետական համակարգը «քայքայված» է, և դրա ներսում կան ինչպես մարդիկ, որոնք ցանկանում են, որ պատերազմն ավարտվի, այնպես էլ «խելագար արմատականներ», որոնք ցանկանում են դրա շարունակությունը։

Վենսը նշել է, որ իր խնդիրն է հաղթահարել այդ իրավիճակը և հասնել լավագույն արդյունքին ոչ միայն ամերիկացի ժողովրդի, այլև ԱՄՆ նախագահի համար։

Նա ընդգծել է, որ դա հեշտ չի լինելու և ժամանակ կպահանջի։

Միևնույն ժամանակ, ԱՄՆ փոխնախագահը վստահություն է հայտնել, որ վերջնական արդյունքում Իրանը երբեք չի ունենա միջուկային զենք, իսկ Միացյալ Նահանգները կհայտնվի ավելի ուժեղ դիրքերում։

«Վստահ կարող եմ ասել, որ ամեն ինչ կծառայի Ամերիկայի Միացյալ Նահանգների շահերին։ Մենք կօգտագործենք մեր տրամադրության տակ եղած բոլոր գործիքները՝ ռազմական, տնտեսական և դիվանագիտական, որպեսզի հասնենք ճիշտ լուծման»,- եզրափակել է Վենսը։