Արարատի մարզում այսօր՝ հուլիսի 14-ին, վրաերթ-վթար է տեղի ունեցել, հայտնում է Shamshyan.com-ը:

Ժամը 21:30-ի սահմաններում «Գազել» մակնիշի ավտոմեքենայի վարորդը Ոսկետափ գյուղի վարչական տարածքում դուրս է եկել հանդիպակաց գոտի, վրաերթի ենթարկել 18 տարեկան հետիոտնին, այնուհետեև բախվել է ճանապարհի թույլատրելի հատվածում կայանված ԶԻԼ (բենզատար) ավտոմեքենային, առաջ ընթանալով բախվել է՝ ցանցապատ ցանկապատին և մոտ 1 մետր բարձրությունից ընկել և բախվել Շիրազի փողոցի 48 շենքի բակում կայանված Opel մակնիշի ավտոմեքենային:

Վրաերթի ենթարկված հետիոտնը շտապօգնության ավտոմեքենայով տեղափոխվել է Վեդիի բժշկական կենտրոն, որտեղ առաջին բուժօգնությունը ստանալուց հետո տեղափոխվել է Երևանի «Սբ. Աստվածամայր» բժշկական կենտրոն:

Ըստ աղբյուրի՝ եթե «Գազելը» չբախվեր բենզատարին, ապա մխրճվելու էր շենքի բակում հավաքված մարդկանց բազմության մեջ, որոնք խնջույք էին կազմակերպել զորակոչիկին բանակ ճանապարհելու առիթով։

Լրատվամիջոցի տեղեկություններով՝ երիտասարդը, որ վրաերթի է ենթարկվել, մասնակցում էր այդ խնջույքին եւ երկու օրից ինքն էլ էր զորակոչվելու: