Արամի 23 շենքը դեռևս մնում է փլուզված։ Ինչպես այսօր լրագրողների հետ հանդիպմանը հայտնել է «Հայաստանի փոքրիկ երգիչներ» երգչախմբի հիմնադիր Տիգրան Հեքեքյանը, իրենք դատարան են դիմել՝ կառավարության որոշումը վիճարկելու համար։

Համաձայն որոշման՝ Արամի 23 շենքը պետական գերակա շահ է ճանաչվել։

Արամի 23-ի վերականգնման հարցը քննարկվում է արդեն բավականին երկար ժամանակ, այստեղ ոչ միայն այս հասցեն, այլև հարակից բարձրահարկ շենքերն են վնասվում, ու գնալով ավելանում է վնասի չափը։

«Երևանի գլխավոր ճարտարապետը ապատեղեկատվություն է տարածում»,- ասել է Տիգրան Հեքեքյանը, նշելով, որ Արթուր Մեսչյանը բազմիցս ասուլիսների ժամանակ ասել է, որ նախագիծ է ներկայացվել քննարկման, սակայն այդ նախագիծը Հեքեքյանը ոչ մի տեղ չի գտնում։

Տեխնիկական ինժեներ Մայքլ Սահակյանն էլ կարծում է, որ Բյուզանդի և Արամի փողոցներում պետք է արգելվի երթևեկությունը, քանի որ այն նպաստում է շենքերի քանդման գործընթացի արագացմանը։

Հիշեցնենք, որ մոտ 6 ամիս առաջ Արամի 23 հասցեում գտնվող շենքի մի հատվածը փլուզվել է։ Արամի 23-ի հարակից շենքերը եւս գտնվում են փլուզման վտանգի տակ, որոշ շենքերի պատերին մեծ ճաքեր են հայտնվել։ 

Մանրամասները՝  A1+ -ի տեսանյութում.