Նախօրեին տեղացած կարկուտը չի շրջանցել նաև Արմավիրի մարզը: Լուկաշին գյուղի բնակիչը մեզ հետ զրույցում նշեց, որ մոտ 13 րոպե տևած կարկուտի հետևանքով ցանքատարածություններն ամբողջությամբ վնասվել են: 

Իր համագյուղացիներից մեկն օրինակ կրել է մինչև 13 միլիոն դրամի վնաս, մեկ այլ բնակիչ մինչև 5 միլիոն դրամի, և այս ցանկը կարելի է շարունակել:  Ձմերուկի, կարտոֆիլի ցանքատարածությունները, խաղողի, ծիրանի այգիները վնասվել են: Մեզ հետ զրույցում Լուկաշինի բնակիչը նշեց, որ այժմ իրենք փակել են Գյումրի Երևան ավտոճանապարհը՝ այսկերպ փորձելով խնդրին լուծում գտնել: Իրենք պահանջում են հանդիպում մարզպետի հետ, ինչպես նաև փոխհատուցում:   Բնակիչը նշեց, որ այժմ իրենց մոտեցել են ոստիկաններ: Բնակիչների հետ է նաև գյուղապետ Կարեն Մկրտչյանը:

Սա Լուկաշին գյուղում վերջին ամիսներին կարկտահարության արդեն 2-րդ դեպքն է: Առաջինը գրանցվել էր 1 ամիս առաջ: Բնակիչը մանրամասնում է, որ հակակարկտային կայանները նախօրեին աշխատել են, սակայն բավական ուշ՝15 րոպե առաջ և որևէ կերպ չեն կարողացել կանխել կարկտահարումը: Նա նաև ընդգծեց, որ գյուղապետը փորձում է լուծումներ գտնել: