ԼՈՒՍԱՆԿԱՐՆԵՐ. Ջրատար խողովակի վթարի պատճառով հեղեղվել է Բազմաղբյուրի բնակչի պտղատու այգին
Արագածոտնի մարզի Բազմաղբյուր համայնքում ջրատարի վթարի պատճառով անելանելի վիճակում է հայտնվել տեղի բնակիչներից մեկը: Վերջինիս այգին արդեն 4-րդ օրն է հեղեղված է խմելու ջրով:
Բնակչի խնդրանքով իր անունը չենք հրապարակում, սակայն Auroranews.am-ի թղթակցի հետ զրույցում նա նշեց, որ նման վթար եղել էր նախորդ շաբաթ, "Վեոլիա ջուր" ընկերության աշխատակիցները ջրի հոսքը դադարեցրել էին: Սակայն, 4 օր առաջ կրկին նույն ջրատարում ևս մեկ վթար է եղել:
Նշենք, որ նշյալ ջրատարով խմելու ջուրը Նազրվան համայնքից հոսում է դեպի Էջմիածին:
Բնակիչը հայտնում է, որ այսօր ջրի հոսքը դադարել է, վթարավերականգնողական աշխատանքներ են իրականացվում, սակայն 4 օր շարունակ հոսող ջուրը կարող է վնաս հասցնել պտղատու ծառերին:
"Վեոլիա ջուր" ընկերության մամուլի խոսնակ Մուրադ Սարգսյանը մեզ հետ զրույցում նշեց, որ ջրատարի վթարը վերացնելու համար իրենք երեկ ամբողջ օրը աշխատել են: Այսօր նույնպես 8-ից 9 ժամ կպահանջվի վթարը կանխելու համար:
"Բավական բարդ վթար է, հուսով ենք, որ արդեն վաղը խողովակաշարից օգտվող հատկապես Էջմիածին քաղաքը ամբողջ ծավալով ջուր կստանա",- ասաց Սարգսյանը` ընդգծելով, որ երկրի տարածքում ջրատար խողովակները հաճախակի են վթարվում հնամաշ լինելու հետևանքով:
