«Գազելը» հարվածել է «Զիլին». խոշոր վթար Գեղարքունիքում

Գեղարքունիքի մարզում հունիսի 4-ին խոշոր ավտովթար է տեղի ունեցել, հայտնում է Shamshyan. com-ը։ Ժամը 17:00-ի սահմաններում Սևան-Մարտունի-Գետափ ավտոճանապարհի 17-րդ կմ հատվածում անհայտ մակնիշի և համարանիշի ավտոմեքենայի վարորդը բախվել է «Զիլ» մակնիշի քարշակ ավտոմեքենային և դիմել փախուստի: «Զիլը» դուրս է եկել երթևեկելի գոտուց, բախվել երկաթե արգելապատնեշներին և կողաշրջված հայտնվել ձորակում, իսկ «Զիլի» վրա բարձված ГАЗ 3110-ն էլ գլխիվայր շրջվել է: Ըստ նախնական տեղեկությունների՝ վթարից տուժածներ չկան: Ոստիկանները օպերատիվ տեղեկություններ են ստացել, որ «Զիլին» հարվածած ավտոմեքենան «Գազել» է, որը ընթանում է դեպի Գավառ: Ճանապարհային ոստիկանները տաք հետքերով հայտնաբերել են փախուստի դիմած վարորդին և նրա ավտոմեքենան: Ոստիկանությունում փաստի առթիվ նյութեր են նախապատրաստվում։