Կաշառքի գործով բաժնի պետի՞ են ձերբակալել. Armdaily. am
Armdaily. am-ի տեղեկություններով ՝ օրերս իրավապահները Գյումրիի քաղաքապետարանի բաժնի պետերից Սլավիկ Ղազարյանին ձերբակալել են կաշառքի գործով։
Լրատվամիջոցի տեղեկությունը փորձել է ճշտել ՀՀ գլխավոր դատախազության հանրային կապերի բաժնի պետ Արևիկ Խաչատրյանից, ով փոխանցեց, որ այդպիսի գործ դատախազությունում չկա:
«Փորձեցինք տեղեկություններ ստանալ նաև Գյումրու քաղաքապետարանից: Քաղաքապետի մամուլի խոսնակ Սոնա Առաքելյանը մեզ հետ զրույցում նշեց, որ տեղեկությունները չեն համապաստխանում իրականությանը.«Որտեղի՞ց Ձեզ այդ տեղեկությունները: Ես չգիտեմ ինչ գործի մասին եք խոսում: Սլավիկ Ղազարյանը աշխատում է այս պահին և ձերբակալված չէ, ոչ էլ բերման է ենթարկվել: Եվ ինքը բաժնի պետ չէ, այլ Անշարժ գույքի կառավարման բաժին աշխատակից»:
Գյումրու քաղաքապետ Սամվել Բալասանյանն էլ հրաժարվեց մեկնաբանություն տալ.«Ես զբաղված եմ, հետո զանգահարեք»:
Նշենք, որ Գյումրու քաղաքապետարանի կայքում նշված է, որ Սլավիկ Ղազարյանը 2009 թ. հուլիսից Գյումրու քաղաքապետարանի աշխատակազմի Անօրինական շինությունների և հողազավթումների վերահսկման բաժնի պետն է: Մեզ հետ զրույցում, սակայն, մամուլի խոսնակը նշեց, որ իրենք վաղուց այդպիսի բաժին չունեն.«Մեր բաժինները միավորվել են և մենք այդ բաժինը չունենք»»,- գրում է լրատվամիջոցը:
