ԵԱՀԿ Մինսկի խմբի hամանախագահները հայտարարություն են տարածել
Հայաստանի եւ Ադրբեջանի արտաքին գործերի նախարարները մոտ ժամանակներս կհանդիպեն ԵԱՀԿ Մինսկի խմբի հովանու ներքո: Այս մասին ասվում է ԵԱՀԿ Մինսկի խմբի համանախագահների՝ տարածաշրջանային այցից հետո արված հայտարարության մեջ:
ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին եւ Էնդրյու Շոֆերը, ինչպես նաեւ ԵԱՀԿ գործող նախագահի անձնական ներկայացուցիչ Անջեյ Կասպրշիկը այցելել են տարածաշրջան մայիսի 27-30-ը:
Համանախագահները Երեւանում մայիսի 27-ին հանդիպել են ՀՀ վարչապետ Նիկոլ Փաշինյանի հետ, մայիսի 30-ին՝ Բաքվում Ադրբեջանի նախագահ Իլհամ Ալիեւի հետ: Երկու մայրաքաղաքներում համանախագահները խորհրդակցություններ են անցկացրել երկու երկրների ԱԳՆ եւ ՊՆ ղեկավարների հետ: Մայիսի 28-ին համանախագահները հանդիպել են Լեռնային Ղարաբաղի փաստացի իշխանությունների հետ: Բաքվում համանախագահները հանդիպել են Լեռնային Ղարաբաղի ադրբեջանական համայնքի ղեկավարի հետ: Լեռնային Ղարաբաղում համանախագահներին Կարմիր Խաչի միջազգային կոմիտեի ներկայացուցիչը տեղեկացրել է հումանիտար հարցերի մասին:
Համանախագահների հայտարարության մեջ նշվում է, որ այցի հիմնական նպատակն էր գնահատել շփման գծում եւ միջազգային սահմանին իրավիճակի զարգացումը, ինչպես նաեւ շարունակել մարտի 29-ին Վիեննայում Հայաստանի եւ Ադրբեջանի ղեկավարների միջեւ, այնուհետ ապրիլի 15-ին Մոսկվայում Հայաստանի եւ Ադրբեջանի ԱԳՆ ղեկավարների միջեւ տեղի ունեցած քննարկումները:
Կողմերի խնդրանքով համանախագահներն առաջարկներ են ներկայացրել հակամարտության կարգավորման գործընթացում կոնկրետ հետագա քայլերի վերաբերյալ, այդ թվում՝ հումանիտար եւ անվտանգության միջոցառումների մասին: ՀՀ եւ Ադրբեջանի ԱԳՆ ղեկավարներն ընդունել են համանախագահների՝ մոտ ժամանակներս հանդիպելու առաջարկը, ինչի մասին համապատասխան պահի կտեղեկացնեն:
Համանախագահները խորը մտահոգություն են հայտնել վերջին զոհերի առնչությամբ եւ կողմերին կոչ արել առավելագույն զսպվածություն ցուցաբերել՝ լարվածությունից խուսափելու համար:
