Սա մահափորձ է. Վարդան Ղուկասյանը՝ «Արթիկ» ՔԿՀ–ում եղբորորդու հետ կատարված դեպքի մասին. News am
ԱԺ պատգամավոր Վարդան Ղուկասյանը պնդում է, որ մայիսի 19–ի գիշերը պատվերով մահափորձ է իրականացվել «Արթիկ» ՔԿՀ–ում պատիժ կրող իր եղբորորդու՝ Վահե Ղուկասյանի նկատմամբ։ NEWS. am–ի հետ զրույցում Վարդան Ղուկասյանը պատմեց կալանավայրում տեղի ունեցած միջադեպի մանրամասները։
«Գիշերը Վահեի խցի դուռը բացել են և քնած մարդու վրա հարձակվել՝ Սաֆարովի դեպքի պես։ 150 կգ–անոց հաղթանդամ տղամարդը քնած սկսել է խփել քնած Վահեին. փորձել է սպանել, վիզը կտրել, դանակը կոխել է դոշի մեջ, դանակը ծռվել է, քանի որ տղան պայքարել է»,–ասաց նա՝ պնդելով, որ խցի դուռը միտումնավոր են բաց թողել։
Պատգամավորը հերքեց քրեակատարողական ծառայության հայտնած այն տեղեկությունը, որ միջադեպի երկու մասնակիցներն էլ խցակիցներ են եղել։
Ղուկասյանը նշեց, որ երկու դատապարտյալները նախկինում միմյանց հետ որևէ կանֆլիկտ չեն ունեցել, իսկ Վահե Ղուկասյանն ըստ հորեղբոր պատմածի՝ կալանավայրում մշտապես հոգ է տարել իր վրա հարձակում գործած դատապարտյալի մասին։
Նա համոզմունք հայտնեց, որ մահափորձը պատվիրված է եղել, հակառակ դեպքում ըստ նրա՝ խցի դուռը բաց չէր լինի։
Ղուկասյանի խոսքով՝ դեպքից երկու օր է անցել, սակայն իրավապահները որևէ քայլ չեն ձեռնարկում մեղավորին պատժելու ուղղությամբ։
«Որ հանկարծ իմ շունը ինչ–որ մեկի շանը բան անի՝ կգրեն, որ Ղուկասյան Վարդանի շունն ինչ–որ մի բան է արել, դեպքից երկու օր է անցել, սպասում եմ տեսնեմ ինչո՞ւ տեղից չեն շարժվում»,–ասաց նա։
Ավելի վաղ հայտնի է դարձել, որ «Արթիկ» ՔԿՀ–ում մայիսի 19–ին միջադեպ է տեղի ունեցել երկու դատապարտյալների միջեւ։
Շեկո մականունով հայտնի Արտյոմ Կարապետյանի սպանության համար 17 տարվա ազատազրկման դատապարտված Վահե Ղուկասյանին, ըստ վերջինիս մտերիմի, փորձել են դանակահարել:
