ԱԺ արտաքին հարաբերությունների հանձնաժողովի նախագահ Ռուբեն Ռուբինյանը, լրագրողների հետ ճեպազրույցում անդրադառնալով հարցին՝ ինչպե՞ս է գնահատում Արցախի նախկին ու ներկա նախագահների՝ ՀՀ երկրորդ նախագահ Ռոբերտ Քոչարյանի դատին ներկայանալու քայլը, ասաց, որ դա գնահատում է որպես փաստ: «Դա գնահատում եմ որպես փաստ, և չեմ կարծում, որ որևիցե բան կարող է վնասել Արցախի և Հայաստանի ժողովրդի եղբայրությանը», - ասաց Ռուբինյանը: Ռուբինյանն արձագանքեց վարչապետի հայտարարությանը՝ Արցախը հակահեղափոխության կենտրոն դարձնելու մասին: «Վարչապետն ասել է հետևյալը, որ եթե ինչ-որ ուժեր փորձեն Արցախը վերածել հակահեղափոխության կենտրոնի, Արցախի ժողովուրդն այն կվերածի հեղափոխության կենտրոնի, և այդ պնդման հետ ես համաձայն եմ: Գաղտնիք չէ, որ պարբերաբար մամուլում գրում են ինչ-որ լարվածության մասին: Վարչապետը հենց այս համատեքստում է ասել` հաշվի առնելով այդ խոսակցությունները, անդրադարձել է այդ թվացյալ վտանգին, և, ըստ էության, ասել, որ այդպիսի վտանգ չկա և չի կարող լինեl այն պարզ պատճառով, որ Արցախի ժողովուրդը հայ ժողովրդի մի մասն է»,- նշեց Ռուբինյանը: Երեկ ՀՀ երկրորդ նախագահ Ռոբերտ Քոչարյանի գործով դատավարության օրը Արցախի գործող նախագահ Բակո Սահակյանը և նախկին նախագահ Արկադի Ղուկասյանը Երևանի ընդհանուր իրավասության դատարանում պնդել էին իրենց երաշխավորությունը՝ Քոչարյանի ազատ արձակման դիմաց: