Ինչպես հայտնել ենք, Հավաքական անվտանգության պայմանագրի կազմակերպության (ՀԱՊԿ) գլխավոր քարտուղարի նշանակման հարցը կորոշվի մայիսի 22-ին ՀԱՊԿ արտաքին գործերի նախարարների խորհրդի նիստում: Անդրադառանալով խնդրին՝ ՀՀ Ազգային Ժողովի արտաքին հարաբերությունների հանձնաժողովի նախագահ Ռուբեն Ռուբինյանն ասաց հետևյալը. «Հայկական կողմի դիրքորոշումը հայտնի է ու ոչինչ չի փոխվում: Հակական կողմն ունեցել է մի քանի սկզբունքների հետ կապված դիրքորոշում ու դրանցից գլխավորն այն է եղել, որ ըստ էության, կա իրավիճակ, երբ ՀԱՊԿ գլխավոր քարտուղարը դադարել է լինել այդ պաշտոնում ու կարգավորված չէ, թե դրանից հետո ի՞նչ է լինելու՝ հաշվի առնելով , որ կա ռոտացիոն սկզբունք: Ու մենք մեր դիրքորոշումն հայտնել ենք, որ գործ ունենք չկարգավորվածության հետ՝ անհրաժետ է կարգավորել և դա անել աշխատանքային կարգով: Մեր դիրքորոշումը եղել է նաև այն, որ ըստ ռոտացիայի կա ժամանակահատված ու այդ ժամանակահատվածը պատկանում է Հայաստանին: Այս երկու սկզբունքների շուրջ են ընթացել և շարունակում են ընթանալ քննարկումները. Հայաստանը չի փոխել իր դիրքորոշումը»: Հարցին, դա նշանակում է, որ մայիսի 22-ին Հայաստանը կրկին պնդելու է, որ իր թեկնածուն պետք է ստանձնի այդ պաշտոնը, Ռուբինյանը հորդորեց այդ հարցն ուղղել ԱԳՆ-ին: