Ֆեյբուքում միջոցառում է բացվել՝ մարիխուանայի միջազգային օրը նշելու համար: Արդեն 200-ից ավելի օգտատերեր հաստատել են միջոցառմանն իրենց մասնակցությունը: Այս մասին տեղեկացնում է Tert. am-ը։ Ապրիլի 20-ը մարիխուանայի միջազգային օրն է և կազմակերպիչները առաջարկում են այդ օրը ժամը 16:20 հավաքվել Ազատության հրապարակում: «Այդ օրը աշխարհի բազմաթիվ քաղաքներում մարդիկ հավաքվում են ծանոթանալու և քննարկելու իրենց երկրի քաղաքականությունը մարիխուանայի վերաբերյալ: Խնդրում եմ նկատի ունենալ՝ սա ցույց կամ բողոքի ակցիա չէ․այս օրը մենք չենք առաջադրելու որևէ պահանջ կամ բողոք կառավարությանը կամ պետական այլ մարմնի»,- գրված է միջոցառման նկարագրության: Ի դեպ, Երևանի քաղաքապետարանն իրազեկված չէ նման միջոցառման անցկացման վերաբերյալ: Tert.am-ի հետ զրույցում այս մասին ասել է քաղաքապետի մամուլի քարտուղար Հակոբ Կարապետյանը: Մարիխուանայի միջազգային օրը նշելու կազմակերպիչները նաև միջոցառման մասնակիցներին կոչ են անում լինել սթափ վիճակում, չունենալ որևէ արգելված նյութ: «Խրախուսվում է ունենալ տեղեկատվական բնույթի պաստառներ մարիխուանայի օգտագործման ոլորտների, օգտակար ազդեցությունների և աշխարհում դրա օգտագործման փորձի արդյունքների մասին։ Գործողության նպատակն է հասարակությանը ներկայացնել ինֆորմացիա մարիխուանայի օգտագործման հետևանքների և այն օգտագործողի պատկերի մասին, որը տասնյակ տարիներ խեղաթյուրվել է»,- ասված է միջոցառման կազմակերպիչների հրապարակած տեքստում: