Գերմանիայի կանցլեր Անգելա Մերկելը չի դիմավորել Մեծ Բրիտանիայի վարչապետ Թերեզա Մեյին, ով Բեռլին էր ժամանել Brexit-ի հարցով բանակցությունների համար։ «Ավանդաբար Մերկելը կարևոր հյուրերին սպասում է նստավայրի դիմացի կարմիր գորգի վրա, սակայն երբ Մեյի մեքենան մոտեցել է, կանցլերը չի եղել այնտեղ, և Մեյը մենակ է ուղևորվել շենք»,-գրում է Politico-ն: Այն բանից հետո, երբ վարչապետը շենք է մտել, նրան հետեւել են լրագրողները: Շենք մտնելուց որոշ ժամանակ անց երկու կանայք միասին դուրս են եկել և լրագրողների ներկայությամբ միմյանց ձեռք սեղմել։ Bild պարբերականը գրում է, որ կանցլերը ներողություն է խնդրել ուշացման համար և խնդրել կրկնել Մեյի ժամանումը տեսախցիկների առջև։ Հանդիպումը շարունակվել է մոտ 1․5 ժամ։ Հանդիպման արդյունքում Մերկելն ու Մեյը եկել են այն համաձայնության, որ անհրաժեշտ է ապահովել Եվրամիությունից Մեծ Բրիտանիայի կարգավորված հեռացումը։ Այս մասին հայտնել է Մեյի գրասենյակի պաշտոնական ներկայացուցիչը։ Քաղաքական գործիչները նաեւ քննարկել են Եմենի եւ Լիբիայի իրավիճակը։