Գեղարքունիքի մարզում դիմակավորված կապկպել են տարեց կնոջը. մանրամասներ

Երեկ՝ ապրիլի 1-ին, կողոպուտի դեպք է տեղի ունեցել Գեղարքունիքի մարզում։ Ժամը 20։20-ի սահմաններում 2 դիմակավորված անձինք մտել են Վարսեր գյուղի 1-ին փողոցի թիվ 44 տուն և կպչուն ժապավենով կապկպել տանը գտնվող 71-ամյա Ռիմա Պողոսյանի ձեռքերն ու ոտքերը։Այս ասին տեղեկանում ենք shamshyan. com-ից: Ինչպես հայտնում է ֆոտոլրագրող Գագիկ Շամշյանը, դիմակավորված ճիվաղները կնոջից պահանջել են գումար, ոսկյա, արծաթյա զարդեր, որի հետո կնոջ ականջներից պոկել են ոսկյա ականջօղերը, ապա տակնուվրա արել տունը, իսկ ննջասենյակից հափշտակել ոսկյա զարդեր և դիմել փախուստի։ Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործություն կատարած անձանց ինքնությունը պարզելու, նրանց և գողոնը հայտնաբերելու ուղղությամբ։ Գ. Շամշյանի տեղեկություններով՝ կողոպտված տարեց կնոջն անօգնական վիճակում հայտնաբերել է փեսան՝ նշված տան բնակիչ՝ 59-ամյա Աղասի Մելքոնյանը, ով ոստիկաններին ու քննիչներին հայտնել է, որ զոքանչի բերանը, թևերն ու ոտքերը եղել են կապկպված, նա ծեծված է եղել։