Կառավարության դիմաց բողոքի ակցիայի ժամանակ «Իմ քայլը» դաշինքի ավագանու անդամ Արմեն Սարգսյանը լրագրողներին հայտնեց, որ Օպերայի և բալետի թատրոնի տնօրեն նշանակվելու առաջարկ չեմ ստացել: «Ես նույնիսկ ասել եմ, որ պետք է Օրբելյանի հետ խոսել, հասկանալ: Թղթաբանությամբ մի քիչ սխալ է մեծ արտիստի հետ խոսելը: Ինքը պետք է Հայաստանին և հայ մշակույթին»,-ասաց նա: Հարցին, թե կցանկանա՞ր օպերայի թատրոնի տնօրեն լինել, կարո՞ղ է լինել տնօրեն, Արմեն Սարգսյանը պատասխանեց. «Կարողը կարող եմ, բայց շատ հարցեր կան: Ես արդեն երեկ գրառում եմ արել, որ ճիշտ վերաբերմունք չի եղել, ճիշտ չեն խոսել մաեստրո Օրբելյանի հետ: Պետք է ուղղվի այդ վերաբերմունքը: Ես Նազենի Ղարիբյանի կողմից առաջարկ չեմ ստացել: Առաջարկ եղել է արտիստների մի մասի կողմից»: Դիտարկմանը, թե Նազենի Ղարիբյանն է հայտարարել, որ Արմեն Սարգսյանի թեկնածուներից մեկն է, նա արձագանքեց. «Ես չգիտեմ՝ նախարարությունում ով է առաջարկել: Ես այլ թատրոնի տնօրենի առաջարկ եմ ստացել նոյեմբերին: Քանի որ արտիստների մեծ մասի հետ մտերիմ եմ, չեմ վախենում այստեղ գալ և հետին մտքեր չկան»: Նշենք, որ մշակույթի գործիչների և Փաշինյանի հանդիպումն արդեն ավարտվել է: Օպերայի անձնակազմի պատվիրակությունը շնորհակալություն հայտնեց մասնակցիներին և հայտնեցին, որ վարչապետի հետ պայմանավորվել են հետևյալը. Թատրոնում տնօրեն չնշանակել, այդ պարտականությունները ժամանակավորապես կկատարի փոխտնօրենը: Վարչապետը ակցիայի մասնակիցներին հանձնարարել է Մշակույթի նախարարության ներկայացրած տվյալներին հակափաստարկներ ներկայացնել, թե ինչու չպետք է Օրբելյանն ազատվի պաշտոնից: Այժմ ակցիայի մասնակցիները գնում են Օպերայի թատրոն` այնտեղ իրենց իրավաբանների հետ աշխատելու համար: Ի դեպ, որևէ կեղծ հակափաստարկի դեպքում անձնակազմի տվյալ աշխատակիցը կկորցնի աշխատանքը: ԱԺ «Լուսավոր Հայաստան» խմբակցության պատգամավոր Գևորգ Գորգիսյանն էլ, որը եկել էր տնօրենի ազատման դեմ բողոքող արտիստների հետ հանդիպելու, լրագրողների հետ զրույցում կարծիք է հայտնել, որ եթե պետք է օրենքը փոխվի, որ Կ. Օրբելյանը կարողանա պաշտոնավարել, ապա կարելի է դրան գնալ: