Վերցրել եմ հեռախոսն ու զանգել եմ Արմեն Սարգսյանին․Նիկոլ Փաշինյան

Լրագրողների հետ հանդիպման ժամանակ անդրադառնալով նախագահ Արմեն Սարգսյանի բացակայությանը Ստեփանակերտում տեղի ունեցած Հայաստանի ու Արցախի անվտանգության խորհուրդների համատեղ նիստին` վարչապետը նշեց, որ անձամբ զանգահարել և փորձել է հրավիրել Արմեն Սարգսյանին, սակայն ինչ-ինչ պատճառներով նրա հետ չի հաջողվել կապ հաստատել: «Ես Անվտանգության խորհրդի նիստի նախորդ առավոտյան եմ գնացել Ստեփանակերտ։ Մենք այդ ողջ օրվա ընթացքում տարբեր ֆորմատներով քննարկումներ ենք ունեցել, որովհետև մեզ անհրաժեշտ էր ճշգրիտ գործողություն անել։ Թե ի՞նչ մենք պետք է անեինք, ի՞նչ շրջանակում, ի՞նչ ֆորմատով՝ որոշվել է միայն նախորդ օրը` ուշ երեկոյան։ Այն ժամանակ, երբ հստակ որոշվել է, թե ինչ պետք է տեղի ունենա, ես ինքս վերցրել եմ հեռախոսն ու զանգել եմ Արմեն Սարգսյանին, և ցավոք, չի հաջողվել կապ հաստատել, չգիտեմ՝ ինչ պատճառով»,- ասաց նա: Փաշինյանը պարզաբանեց, որ դրանից հետո ինքն Անվտանգության խորհրդի քարտուղարին է հանձնարարել, որ Հանրապետության նախագահի հետ կապվի ու հրավիրի նիստի։ «Այդտեղ մի հատ ուրիշ սկանդալ էլ կա՝ ուղղաթիռային, քանի որ Պաշտպանության նախարարը հանդիպում ուներ, նա հաջորդ օրն առավոտյան ուղղաթիռով պետք է գար, ես նաև ասել եմ Անվտանգության խորհրդի քարտուղարին, որ նախագահին փոխանցեն՝ առավոտյան ուղղաթիռով Պաշտպանության նախարարի հետ խնդրում ենք, որ ինքը գա, ներկա լինի», - ասաց Նիկոլ Փաշինյանը՝ նշելով, որ դրանից հետո առիթ չի ունեցել նախագահից ճշտելու, թե ամեն դեպքում ի՞նչ է կատարվել ու ինչու՞ նա չի եկել Անվտանգության խորհրդի նիստին մասնակցելու։