Ազատության հրապարակում շարունակվում է իրավիճակը լարված մնալ: Քիչ առաջ, երբ Կենտրոն համայնքի ղեկավար Վիկտոր Մնացականյանը գնաց դեպի Ջազզվե սրճարան, այնտեղ արդեն նրան սպասում էին ԲՀԿ պատգամավորներ Նաիրա Զոհրաբյանը և Արման Աբովյանը: Նրանք Մնացականյանին կոչ էին անում բռնություն չկիրառել և երկխոսություն սկսել սրճարանատերերի հետ, միաժամանակ, բարձրացրին ոստիկանության կողմից բերման ենթարկվածների հարցին: Վիկտոր Մնացականյանը հավաստիացրեց, որ որևէ բռնություն չի կիրառվել, ոստիկաններն իրականացրել են իրենց գործառույթները և, եթե անգամ բռնություն է եղել, ապա բողոքավորների կողմից: Այնուհետև, Վիկտոր Մնացականյանը կոչ արեց պատգամավորներին անցնել մի կողմ և առանձին զրուցել, որտեղ խոսակցությունը կրկնվեց: Վիկտոր Մնացականյանը կրկին չկարողացավ պատգամավորների հետ առանձին զրուցել, որովհետև նրանց շուրջ նորից բողոքավոր զանգվածը հավաքվեց: Նշեմ, որ Մնացականյանը փորձեց ներկայացնել ապամոնտաժվող սրճարանների կողմից տարիներ շարունակ իրականացրած իրավախախտումները, բայց խոսակցությունը պատգամավորները ընդհատեցին, նշելով, թե իրենց կողմից ներկայացվող խնդիրը ոչ թե սրճարանների ապամոնտաժումն է, այլ մարդկանց իրավունքների պաշտպանությունը: Վիկտոր Մնացականյանն էլ բացատրեց, որ ոստիկանությունը ստիպված է ինչ-որ քայլերի գնացել, քանի որ բողոքավորները շատ վատ են իրենց պահել, նույնիսկ հայհոյել են: Նշեմ, որ քիչ առաջ Վիկտոր Մնացականյանը մոտ կես ժամ ժամանակ խնդրեց քաղաքապետարանի իր գործընկերների հետ իրավիճակը քննարկելու համար: