Ռուսաստանում դատարանը վճռել է համայնքային բնակարանից դուրս հանել Եկատերինբուրգ քաղաքում այրվող տնից երեք երեխայի փրկած Գևորգ Ավետիսյանին, կնոջը և նրանց 5 երեխաներին ընտանիքի հետ միասին հայտնվել է բարդ իրավիճակում: Ինչպես վերջինս պատմել է NTV հեռուստաալիքին տված հարցազրույցում, երկբնակարան տան այն հատվածը, որտեղ բնակվում է Գևորգի ընտանիքը, պատկանել է ձեռնարկությանը, որտեղ աշխատել է նրա կնոջՙ Տատյանայի հայրը: Տան մյուս բնակարանում բնակվում է Տատյանայի քրոջ ընտանիքը: Տատյանան այդ բնակարանում ապրել է ծնված օրվանից և չի պատկերացրել, որ օրինական չի բնակվում այդտեղ, մինչև վիճաբանություն է տեղի ունեցել քրոջ հետ: Հենց նա էլ դատարան է դիմել: «Բոլորն անտարբեր են, ոչ ոք չի ցանկանում ոչնչով օգնել»,- ասել է ընտանիքի հայրը: Բազմազավակ ընտանիքին պաշտոնապես դուրս չեն անում փողոց: Տատյանան կեցության թույլտվություն ունի քրոջ բնակարանում, սակայն բնակարանն ընդամենը 30 քառ. մետր է, և քույրն էլ ուրախ չէ ընդունելու բազմազավակ ընտանիքին: Երիտասարդ զույգը չի կարող նաև հիփոթեքային վարկ ձևակերպել, Տատյանան դեկրետային արձակուրդում է գտնվում, իսկ Գևորգը Հայաստանի քաղաքացի է, թեև Ռուսաստան է տեղափոխվել 14 տարի առաջ: Հիշեցնենք, որ մոտ մեկ ամիս առաջ Գևորիգին պարգևատրել էին իր հերոսական արարքի համար և կրակմարիչ նվիրել: