Մինչև 7 տարեկան երեխաների բուժման դեպքում վճարն անթույլատրելի է․ Արսեն Թորոսյան

Հիվանդանոցներում մինչև 7 տարեկան երեխաների բուժումն անվճար է և որևէ վճար չպետք է գանձվի հիվանդանոցի կողմից: Այս մասին այսօր լրագորղների հետ զրույցում ասաց ՀՀ առողջապահության նախարար Արսեն Թորոսյանը՝ անդրադառնալով քաղաքացիների կողմից ստացվող այն բողոքներին, որ մանկաբուժությունը վճարովի է։ «Մենք պետք է հասկանանք, որ այդ ապօրինի վճարումները ոչ միայն առողջապահության հետ կապված խնդիր են, այլև հարկային վարչարարության: Դա փաստացի ապօրինի եկամուտ է և կարող է դիտվել շորթում: Նման ահազանգերի հետևից գնալով՝ մենք դիմում ենք իրավապահներին, որպեսզի իրավական գնահատկան տրվի, ինչու չէ՝ նաև ուղղակիորեն աշխատում ենք հիվանդանոցների տնօրինությունների հետ, որպեսզի իրենք իրենց աշխատանքը կազմակերպելիս՝ բացառեն նման երևույթները»: Թորոսյանը ևս մեկ անգամ ընդգծեց, որ մանկաբուժության մեջ պետության կողմից տրվող գումարները շատ ավելին են, քան մեծահասակաների համար, հետևաբար նման դեպքերը պետք է բացառվեն մանկաբուժության մեջ: «Նորից եմ կրկնում՝ մինչև 7 տարեկան երեխաների դեպքում վճարն անթույլատրելի է և ամեն կերպ պետք է կասեցվի»,- եզրափակեց նախարարը: