![Կցանկանայինք լսել կոնկրետ բացատրություններ. ՌԴ ԱԳՆ-ն՝ Ադրբեջանին](https://auroranews.am/storage/img/base_image/old/b1759892790be1977c98dbf876bf094f.webp)
Կցանկանայինք լսել կոնկրետ բացատրություններ. ՌԴ ԱԳՆ-ն՝ Ադրբեջանին
![Կցանկանայինք լսել կոնկրետ բացատրություններ. ՌԴ ԱԳՆ-ն՝ Ադրբեջանին](https://auroranews.am/storage/img/base_image/old/b1759892790be1977c98dbf876bf094f.webp)
ՌԴ արտգործնախարարությունը պատասխանել է Ադրբեջանի ԱԳՆ-ի մամուլի ծառայության տարածած հաղորդագրությանը, որում վերջիններս արձագանքել էին հայկական ծագմամբ ՌԴ քաղաքացիների մուտքն Ադրբեջան արգելելու ու դրա հետ կապված ՌԴ ԱԳՆ-ի դատապարտող կոչին: Տարածած հայտարարության մեջ ռուսական կողմն ուշադրություն է հրավիրել ադրբեջանցի գործընկերների արձագանքի՝ դիվանագիտական էթիկայի նորմերն ակնհայտորեն խախտող բնույթի վրա: Ռուսաստանի ԱԳՆ-ն զարմանք է հայտնել խնդիրը «չուռճացնելու» ադրբեջանական կողմի հորդորի առնչությամբ՝ նշելով, որ դա տարակուսանք է առաջացնում:
«Ծանոթացանք Ադրբեջանի ԱԳՆ-ի մամուլի ծառայության արձագանքին: Նշենք մեկնաբանության՝ դիվանագիտական էթիկայի շրջանակներից դուրս եկող տոնը: Պակաս անհասկանալի չէ Ադրբեջան մեկնող ՌԴ քաղաքացիների նկատմամբ խտրականության թեման «չծածանելու» Բաքվի պահանջը: Նման մոտեցումն, իհարկե, անընդունելի է: ՌԴ քաղաքացիների շահերի և իրավունքների պաշտպանությունը մեր արտաքին քաղաքականության բացարձակ առաջնահերթություններից է: Միևնույն ժամանակ, այս կամ այն երկրում երկկողմ բարեկամական հարաբերությունների առկայությունը սովորաբար համարվում է խթանիչ գործոն՝ տվյալ խնդրի կառուցողական լուծման համար»,- ասվում է ՌԴ ԱԳՆ-ի հայտարարության մեջ: