Քոչարյանի գործով դատավորը մտադիր է լքել Հայաստանը․ «Ժողովուրդ»

«Ժողովուրդ» թերթը գրում է․ «Դատական համակարգում տարածված լուրերի համաձայն՝ ՀՀ քրեական վերաքննիչ դատարանի դատավոր Ալեքսանդր Ազարյանը մտադիր է առաջիկայում լքել Հայաստանը՝ եվրոպական երկրներից մեկից քաղաքական ապաստան խնդրելով: «Ժողովուրդ» օրաթերթի աղբյուրների պնդմամբ՝ Ազարյանն իր հայտարարությունը, թե համակարգի վրա բիրտ ճնշում կա, հենց այդ նպատակով է հնչեցրել, որպեսզի հնարավոր լինի ներկայանալ որպես նոր իշխանությունների կողմից քաղաքական հալածյալ: Հիշեցնենք, որ Ազարյանի որոշմամբ՝ ամռանը փոխվեց «Մարտի 1-ի» գործով մեղադրյալ ՀՀ երկրորդ նախագահ Ռոբերտ Քոչարյանի խափանման միջոցը: Ազարյանի այդ որոշումը մեծ դժգոհության ալիք բարձրացրեց հանրության մոտ, և տեսակետ կա, որ դատավորն ուզում է օգտվել իրավիճակից: «Ժողովուրդ» օրաթերթը եղելությունը փորձեց պարզել անձամբ դատավոր Ազարյանից, սակայն վերջինս, իմանալով որ զանգահարողը լրագրող է, չցանկացավ անգամ լսել հարցը և անջատեց հեռախոսը: Մեր այլ փորձերը՝ դատավո¬րի հետ զրուցելու, անցան ապարդյուն, քանի որ նա այլևս չպատասխանեց մեր հեռախոսազանգերին»։