Նարեկ Սարգսյանի ձերբակալության լուրը, նախընտրական քարոզչության հետ կապ ունի՞. Վ.Օսիպյան

Նարեկ Սարգսյանի ձերբակալության մասին լուրի հրապարակումը նախընտրական քարոզչության վերջին օրը ուղղակի զուգադիպություն էր: Այս մասին Ազատություն ռ/կ-ի հետ զրույցում ասել է Երևանի ոստիկանապետ Վալերիյ Օսիպյանը: Հարցին, թե արդյոք հատուկ է Նարեկ Սարգսյանի ձերբակալման լուրը հրապարակվել քարոզարշավի վերջին օրը՝ դեկտեմբերի 7-ին, Վալերիյ Օսիպյանը պատասխանեց. «Հավաստիացնում եմ Ձեզ, որ ուղղակի համընկել է, ես անգամ մտածել եմ մեր լրատվականի պետի հետ՝ արդյոք լուրը տանք, թե ոչ, բայց այդ արանքում երկու-երեք օր էր անցնելու, և չէինք բացառում,որ որևէ մի տեղից՝ հենց մեր գործընկերների մոտից կամ Նարեկ Սարգսյանի հարազատների կողմից տարածվեր այդ լուրը, և բոլորը իմանային: Կաշկանդված չենք , քանի որ չկա որևէ պայմանավորվածություն կամ նախապայման»: Հիշեցնենք, որ 37-ամյա Նարեկ Սարգսյանը ձերբակալվել է անցած շաբաթ Չեխիայի մայրաքաղաք Պրահայի բնակելի շենքերից մեկում: Հայաստանի իրավապահները Նարեկ Սարգսյանին մեղադրանք են ներկայացրել անցած ամռանը, երբ վերջինիս՝ Երևանի կենտրոնում գտնվող բնակարանում ապօրինի զենք ու թմրանյութեր էին հայտնաբերել: Ընդ որում, սա Սարգսյանին վերագրվող հանցանքների ամբողջական ցանկը չէ, Հայաստանի ոստիկանությունը նաև նշել է, որ հայտնաբերման պահին վերջինս ներկայացրել է Գվատեմալայի քաղաքացու կեղծ անձնագիր՝ Ֆրանկլին Գոնսալեսի անհատական տվյալներով։