Վովայի պատվերով բռնել են․ քրեական հեղինակություն

Երեւան քաղաքի ընդհանուր իրավասության դատարանը դատավոր Նելլի Բաղդասարյանի նախագահությամբ հեռացավ խորհրդակցական սենյակ՝ քրեական հեղինակություն Նորատուսցի Ալիկ մականունով հայտնի Ալիկ Բանդուրյանի, Չարբախցի Գեղամ մականունով հայտնի Պետրոս Իսրայելյանի եւ Բդո մականով հայտնի Արմեն Գասպարյանի վերաբերյալ քննվող սպանության գործով դատավճիռ կայացնելու: Ինչպես հայտնում է Armtimes.com-ը՝ մինչ դատարանի խորհրդակցական սենյակ հեռանալը այսօր ամբաստանյալների պաշտպանները հանդես եկան ռեպլիկով: Մեղադրող դատախազ Գեւորգ Գեւորգյանի ռեպլիկի ժամանակ քրեական հեղինակություններ Նորատուսցի Ալիկի եւ Չարբախցի Գեղամի նյարդերը տեղի են տվել: Դատախազի խոսքի ժամանակ Պետրոս Իսրայելյանը ինչ-որ բանից դժգոհություններ է հայտնել, որը ապակիներից այն կողմ գտնվողների համար լսելի չի եղել: Դատավոր Նելլի Բաղդասարյանը կարգադրել նրան ոտքի կանգնել, սակայն Իսրայելյանը հրաժարվել է: «Քո խաթր կանգնում եմ, որպես կին»,- լրատվամիջոցի փոխանցմամբ՝ ասել է Իսրայելյանը եւ ոտքի կանգնել: Դատավորը հիշեցրել է, որ ամբաստանյալը պարտավոր է ենթարկվել դատարանի օրինական կարգադրություններին եւ այդտեղ «խաթրի» հարց լինել չի կարող: Իսրայելյանը, սակայն, այդ զգուշացումից հետո էլ շարունակել է խոսել։ Ամբաստանյալ, քրեական հեղինակություն Ալիկ Բանդուրյանը ռեպլիկի կարգով հայտարարեց․ «Վովա Գասպարյանի պատվերով բռնել են, պատվերով նստցրել են, ճնշում գործադրում են, անմեղ նստած ենք, խնդրանքս արդարացի որոշում կայացնելն ա»,- հայտարարել է Բանդուրյանը: