Արարատի մարզպետը հաստատում է՝միջադեպ եղել է, օգնականին էլ հեռացրել է

ԶԼՄ-ներում տեղեկություն է տարածվել «Իմ քայլը» դաշինքի 5-րդ միասնական ընտրատարածքում ռեյտինգային ընտրակարգով ԱԺ պատգամավորի թեկնածուներ Գարիկ Սարգսյանի և Տիգրան Պարսիլյանի միջև տեղի ունեցած վիճաբանության վերաբերյալ։ Արարատի մարզպետի պաշտոնակատար, արձակուրդում գտնվող Գարիկ Սարգսյանը չի հերքում, որ միջադեպ եղել է։ «Չեմ հերքում, որ օրեր առաջ տեղի է ունեցել միջադեպ «Իմ քայլը» դաշինքից ռեյտինգային ընտրակարգով առաջադրված թեկնածուի՝ Տիգրան Պարսիլյանի համակրի և իմ օգնականի միջև, սակայն ուզում եմ շեշտել, որ անձամբ ես որևէ կերպ չեմ առնչվել այդ միջադեպի հետ: Միջադեպից հետո իմ օգնականը բացատրագիր է ներկայացրել ոստիկանությունում, դրանից բացի, իմ որոշմամբ՝ ազատվել է աշխատանքից: Իմ քարոզարշավն այս օրերին ընթանում է բնականոն հունով և առողջ մթնոլորտում: Իմ թիմում շարունակում է տիրել սիրո և հանդուրժողականության մթնոլորտը: Սա ես որակում եմ որպես ԶԼՄ-ների կողմից քարոզարշավի ընթացքում «Իմ Քայլը» դաշինքի վրա ստվեր գցելու միտում»,-գրել է Սարգսյանը։ Հիշեցնենք, որ մամուլում լուրեր էին տարածվել, որ Արարատի մարզպետի պաշտոնակատար Գարիկ Սարգսյանի հրահանգով է ծեծի ենթարկվել իր իսկ տեղակալը, որը հանդգնել է ղեկավարի խոսքին հակառակվել: Միջադեպին ականատես են եղել նաև Ն. Փաշինյանի հետ հանդիպման եկած մարդիկ: