Փաշինյանը դեկտեմբերի 6-ին կլինի Սանկտ Պետերբուրգում

Վարչապետի պաշտոնակատար Նիկոլ Փաշինյանը դեկտեմբերի 6-ին գնալու է Սանկտ Պետերբուրգ։ Այդ օրը տեղի է ունենալու Եվրասիական տնտեսական միության բարձրագույն խորհրդի նիստը, թեև, ինչպես ավելի վաղ հաղորդվել էր, չի որոշվելու խորհրդի գլխավոր քարտուղարի հարցը։ Փաշինյանն այս մասին խոսել է Մասիսում քարոզարշավի ընթացքում։ «Ես երեկ Արենի գյուղում մեկնաբանություն եմ տվել՝ կապված ՀԱՊԿ–ի՝ դեկտեմբերի 6-ի գագաթնաժողովի հետ, բայց այդտեղ մի փոքր թյուրըմբռնում էր առաջացել իմ՝ Սանկտ Պետերբուրգ մեկնել–չմեկնելու հետ կապված։ Ես երեկ ասել էի, որ ՌԴ նախագահն ինձ հետ հեռախոսազրույցում առաջարկել է դեկտեմբերի 6-ին նախատեսված ՀԱՊԿ գագաթնաժողովը չանցկացնել՝ մինչեւ աշխատանքային կարգով այդ հարցը չքննարկենք, բայց, միեւնույն ժամանակ, դեկտեմբերի 6-ին ունենք Եվրասիական տնտեսական միության բարձրագույն խորհրդի նիստը, որը Սանկտ Պետերբուրգում տեղի է ունենալու, եւ ես մասնակցելու եմ այդ նիստին»,– պարզաբանեց նա։