Ռուսաստանը եղել է, կա և կլինի արկտիկական առաջատար պետություն. Լավրով

Ռուսաստանը եղել է, կա և կլինի արկտիկական առաջատար պետություն, հայտարարել է ՌԴ ԱԳ նախարար Սերգեյ Լավրովը:

«Մենք կշարունակենք բարձր լայնությունների համալիր զարգացումը, ինչպես նաև արկտիկական գոտու ենթակառուցվածքների բարելավումը՝ Ռուսաստանի օրենսդրության և երկրի զարգացման նպատակներին համապատասխան», - ասել է նա Arktik.ru-ի հետ զրույցում։

ՌԴ-ն կշարունակի ճանաչել արկտիկական ծովային տարածքները որպես Համաշխարհային օվկիանոսի անբաժանելի մաս: Այնտեղ գործում են 1982 թվականի ՄԱԿ-ի Ծովային իրավունքի մասին կոնվենցիայի դրույթները, որոնցով ամրագրված են Արկտիկայի ափամերձ պետությունների համար հատուկ իրավունքներ և պարտականություններ։ Այս իրավունքների և պարտականությունների նկատմամբ պարտավորությունը ամրագրվել է Իլուլիսատի հռչակագրում, որը 2008 թվականին ընդունվել է արկտիկական «հնգյակի»՝ Ռուսաստանի, Դանիայի, Կանադայի, Նորվեգիայի և ԱՄՆ-ի կողմից։

«Ներկայում մենք անհրաժեշտություն չենք տեսնում մշակելու նոր միջազգային իրավական գործիքներ՝ բարձր լայնություններում տնտեսական և այլ գործունեությունը կարգավորելու համար»։

Նա ընդգծել է, որ Ռուսաստանի հակառակորդները վաղուց պետք է պատմությունից դաս քաղած լինեին և հասկանային, որ պատժամիջոցների և սպառնալիքների լեզվով խոսելն ապագա չունի։

«Ռուսաստանը նախընտրում է կառուցողական երկխոսությունը աշխարհի ցանկացած տարածաշրջանում, բայց անհրաժեշտության դեպքում մեր ազգային շահերը կպաշտպանվեն բոլոր հասանելի միջոցներով», - եզրափակել է ՌԴ արտաքին գործերի նախարարը։