Փակեք որքան ուզում եք, ես բանտից դուրս կգամ ինչպես Նելսոն Մանդելան. Սահակաշվիլի

Վրաստանի նախկին նախագահ Միխեիլ Սահակաշվիլին հայտարարել է, որ նույնիսկ լիակատար մեկուսացումը չի խանգարի իրեն՝ իր գաղափարները հասցնել աջակիցներին։

Դատական նիստի ընթացքում Սահակաշվիլին հայտնել է, որ իր թվային ավատարն է ստեղծվում՝ արհեստական բանականության միջոցով։

«Արդեն պատրաստվում է արհեստական բանականությամբ իմ ավատարը․ այն ավելի լավ տեսք ունի, քան ես, բայց դա հենց ես եմ։ Նա խոսում է ինչպես Միշան իր լավագույն տարիներին, ունի նույն ժեստերն ու դիմախաղը, և դրանում զետեղվելու է այն ամենը, ինչ մտածում եմ»,- ասել է նա։

Նախկին նախագահը նաև հայտարարել է, որ համոզված է՝ ապագայում ազատ է արձակվելու և համեմատել է իր ճակատագիրը այն քաղաքական գործիչների հետ, որոնք բանտարկությունից հետո վերադարձել են քաղաքականություն։

Սահակաշվիլին նշել է Հարավաֆրիկյան Հանրապետության առաջին սևամորթ նախագահ նելսոն Մանդելային, Բրազիլիայի նախագահ Լուիս Ինասիու դա Սիլվաին և Մալայզիայի վարչապետ Անվար Իբրահիմին՝ որպես օրինակներ։

Նրա խոսքով՝ երկարատև կալանքը ոչ թե թուլացնում, այլ մեծացնում է իր քաղաքական վերադարձի հնարավորությունը։ Սահակաշվիլին ընդգծել է, որ իր նպատակը միայն իշխանության վերականգնումը չէ, այլ նոր սերնդի քաղաքական գործիչների ձևավորումը։

Նա նաև վստահություն է հայտնել, որ իր աջակիցները կկարողանան ձևավորել նոր քաղաքական ուժ, որը, ըստ նրա, կվերականգնի Վրաստանի անկախ ուղին և կապահովի երկրի զարգացումը։