Կառավարությունը «Seaside Startup Summit Armenia 2026»-ի համար հատկացրել է 200 մլն դրամ

Հուլիսի 26-ին պաշտոնապես ազդարարվել է «Seaside Startup Summit Armenia 2026»-ի մեկնարկը, որն արդեն երկրորդ տարին անընդմեջ իրականացվում է ՀՀ կառավարության համաֆինանսավորմամբ։

Միջոցառման կազմակերպման նպատակով, ինչպես 2025-ին, այնպես էլ 2026 թվականին պետական բյուջեից հատկացվել է 200 մլն ՀՀ դրամ։ Այս տեղեկությունը հայտնում է ԲՏԱ նախարարությունը։

Բացման արարողության ժամանակ ողջույնի խոսքով հանդես է եկել ՀՀ բարձր տեխնոլոգիական արդյունաբերության նախարար Մխիթար Հայրապետյանը։ Նա ընդգծել է, որ արդեն տասներորդ տարին անընդմեջ Սևանի ափին կազմակերպվող այս նախագիծը դարձել է այն եզակի հարթակը, որը միավորում է նորարար գաղափարներ ունեցող մարդկանց ու ձևավորում տեխնոլոգիական համայնք։

«Հարյուրավոր տաղանդավոր անհատներ, նորարարներ և ստարտափներ են մասնակցել այս նախագծին։ Սա ՀՀ կառավարության համար կարևոր նշանակություն ունեցող նախաձեռնություն է, և հենց այդ պատճառով մենք շարունակում ենք աջակցել այս ծրագրին՝ մեծ հավատով և ոգևորությամբ»,– նշել է նախարարը։

Մխիթար Հայրապետյանի փոխանցմամբ՝ «Seaside Startup Summit Armenia»-ն պարզապես գագաթնաժողով չէ, այլ միջավայր, որտեղ ծնվում են նոր գաղափարներ, ձևավորվում են համագործակցություններ և ստեղծվում ապագայի տեխնոլոգիական լուծումները։

«Վստահ եմ, որ հենց այստեղից են սկիզբ առնելու նոր հաջողության պատմություններ, իսկ Հայաստանից և «Seaside Startup Summit Armenia 2026»-ից մասնակիցները կհեռանան ոչ միայն վառ հիշողություններով, այլև նոր գործընկերություններով, գիտելիքով և մեծ նպատակներով»,–եզրափակել է նախարարը։

Հուլիսի 26-ից մինչև օգոստոսի 1-ը կայանալիք «Seaside Startup Summit Armenia 2026»-ի շրջանակում կհամախմբվեն աշխարհի տարբեր երկրների ստարտափների հիմնադիրներ, ներդրողներ, վենչուրային ֆոնդերի և տեխնոլոգիական ընկերությունների ներկայացուցիչներ, մենթորներ, ոլորտի առաջատար փորձագետներ և նորարարության էկոհամակարգի առաջնորդներ։