18:00 Լուրերը մեկ տողով. Ադրբեջանից Հայաստան եկող ապրանքներ. Իրանում բռնկված հրդեհ

Անցած ժամվա լուրերը՝ հակիրճ և բովանդակային.

•Վանաձորի նախկին քաղաքապետ, պատգամավորության թեկնածու Մամիկոն Ասլանյանի նկատմամբ հարուցված հին քրեական գործը դատարան է ուղարկվել։ Քաղաքական գործիչն իր նկատմամբ իրականացվող իրավական գործընթացն անվանել է ճնշում՝ իր քաղաքական ակտիվությունը սահմանափակելու նպատակով։

•Ուկրաինայի նախագահ Վլադիմիր Զելենսկին պարզաբանել է պաշտպանության նախարարի պաշտոնանկությունը՝ այն կապելով Գլխավոր շտաբի հետ ունեցած համակարգային հակամարտության հետ։ Պաշտոնից հեռացված նախարարն իր հերթին զինված ուժերի գլխավոր հրամանատարին մեղադրել է բարեփոխումներին խոչընդոտելու մեջ։

•Մեծ Բրիտանիան 300 միլիոն եվրոյի ռազմական աջակցություն է հատկացրել Ուկրաինային՝ շվեդական բազմաթիրախային կործանիչներ գնելու նպատակով։ Ֆինանսավորումը նախատեսում է մինչև 2029 թվականը ձևավորել 16 ինքնաթիռից բաղկացած էսկադրիլիա, ինչպես նաև պատրաստել անձնակազմը։

•Թեհրանը Եմենի հուսիթ ապստամբներին հանձնարարել է նախապատրաստվել Կարմիր ծովի նավթային երթուղու արգելափակմանը։ Այս քայլն Իրանի արձագանքն է իր էներգետիկ ենթակառուցվածքներին հարվածելու վերաբերյալ ԱՄՆ սպառնալիքներին։

•Իրանի Մաշհադ քաղաքում գտնվող Իմամ Ռեզայի սրբավայրի համալիրի տարածքում խոշոր հրդեհ է բռնկվել։ Դեպքի վայր ժամանած հրշեջներին հաջողվել է արագ տեղայնացնել կրակը, որն առաջացել էր տարածքում գործող բիտումի արտադրամասում։

•Անոմալ շոգն ու երաշտը խորը ճգնաժամի են հանգեցրել Ֆրանսիայի գյուղատնտեսության և կաթնամթերքի արտադրության ոլորտում։ Ֆերմերների միությունը հայտնել է, որ ստեղծված աղետալի իրավիճակի պատճառով ճյուղի կորուստները կարող են հասնել մինչև 30 տոկոսի։


•Ադրբեջանը պաշտոնական տվյալներով սկսել է պլաստիկե շինարարական դետալներ արտահանել Հայաստան։ Ըստ հրապարակված վիճակագրության՝ տարվա առաջին կիսամյակում Ադրբեջանից Հայաստան իրականացված ընդհանուր արտահանման ծավալը կազմել է ավելի քան 17 միլիոն դոլար։