Կիբեռոստիկանությունը զգուշացնում է՝ «Մեկ ամիս անվճար տրանսպորտ» առաջարկը խաբեություն է

Կիբեռոստիկանությունը զգուշացնում է քաղաքացիներին՝ չհավատալ սոցիալական ցանցերում տարածվող «Մեկ ամիս անվճար տրանսպորտ» առաջարկներին։

ՆԳՆ-ից հայտնում են, որ վերջին շրջանում գրանցվում են հափշտակության դեպքեր, երբ Facebook և Instagram հարթակներում Telcell Wallet-ի անունից տարածվում են կեղծ գովազդներ՝ քաղաքացիներին առաջարկելով օգտվել Երևան քաղաքի տրանսպորտից մեկ ամիս անվճար։

Կեղծ հղումներով անցնելուց հետո քաղաքացիներից պահանջվում է մուտքագրել հեռախոսահամարին ուղարկված հաստատման կոդը։ Այդ կոդը տրամադրելու դեպքում խարդախները կարողանում են մուտք գործել Telcell Wallet հաշիվներ և հափշտակել այնտեղ առկա գումարները, ինչպես նաև կցված բանկային քարտերի միջոցները։

Կիբեռոստիկանությունը հորդորում է չանցնել կասկածելի հղումներով, չտրամադրել SMS-ով ստացված հաստատման կոդերը, գաղտնաբառերը և այլ գաղտնի տվյալներ, իսկ Telcell Wallet-ի հետ կապված գործողություններ կատարել միայն պաշտոնական հավելվածի միջոցով։

«Խարդախները հաճախ օգտագործում են գրավիչ առաջարկներ, անվճար ծառայությունների կամ ակցիաների խոստումներ՝ քաղաքացիներին մոլորեցնելու և նրանց ֆինանսական միջոցներին հասանելիություն ստանալու նպատակով»,- նշվում է ՆԳՆ հաղորդագրության մեջ։