Գրետա Թունբերգն իրեն սոսնձել է գետնին՝ Բեռլինում բողոքի ակցիայի ժամանակ

Շվեդ էկոակտիվիստ Գրետա Թունբերգը և բողոքի ակցիայի մյուս մասնակիցները Բեռլինում իրենց սոսնձել են գետնին՝ գերմանական պաշտպանական «Rheinmetall» հոլդինգի գրասենյակի մոտ։ Այս մասին հայտնում է Բեռլինի ոստիկանությունը։

Իրավապահների տվյալներով՝ Բեռլինի կենտրոնում՝ Բրանդենբուրգյան դարպասների հարևանությամբ գտնվող Փարիզյան հրապարակում, հավաքվել է շուրջ 40 ակտիվիստ։ Նրանք սոսնձվել են գետնին՝ փակելով դեպի Էբերտշտրասե փողոց տանող անցումներից մեկը։

Ակցիան կազմակերպել է «Peacefully against Genocide» («Խաղաղ կերպով ընդդեմ ցեղասպանության») շարժումը։ Մասնակիցները բողոքել են Բեռլինի Վեդինգ թաղամասում գտնվող «Rheinmetall»-ի գործարանի գործունեության դեմ, ինչպես նաև դատապարտել են Գազայի հատվածում ընթացող պատերազմը և գերմանական սպառազինության կիրառումը ռազմական հակամարտությունների գոտիներում։

Ոստիկանությունը հայտնել է, որ դեպքի վայրում աշխատել է շուրջ 70 իրավապահ։ Ակցիայի մասնակիցներին աստիճանաբար հեռացրել են տարածքից, պարզել նրանց ինքնությունը և տվել տարածքը լքելու պահանջ։ Ոստիկանության տվյալներով՝ բողոքի ակցիան անցել է խաղաղ պայմաններում, լուրջ միջադեպեր չեն գրանցվել։