«Նյու Յորք Թայմս»-ը մեղադրում է Թրամփի վարչակազմին՝ մամուլի վրա ճնշում գործադրելու մեջ

Դոնալդ Թրամփի վարչակազմը «Նյու Յորք Թայմս»-ի մի քանի լրագրողների կանչել է ցուցմունք տալու դաշնային մեծ ժյուրիի առջև՝ Կատարի կողմից նվիրաբերված նոր նախագահական ինքնաթիռի անվտանգության խնդիրների վերաբերյալ հրապարակումից հետո, հայտնում է «Նյու Յորք Թայմս»-ը։

Պարբերականի տվյալներով՝ որոշ լրագրողների ծանուցագրերը անձամբ են հանձնել դաշնային գործակալները։ Թերթը դա գնահատել է որպես մամուլի նկատմամբ ճնշման և ԱՄՆ Սահմանադրության Առաջին փոփոխությամբ երաշխավորված խոսքի ազատության սահմանափակման փորձ։ Ավելի վաղ «Նյու Յորք Թայմս»-ը, հղում անելով անանուն աղբյուրներին, գրել էր, որ Կատարի կողմից նվիրաբերված նոր նախագահական ինքնաթիռը չի համալրվել անվտանգության մի շարք համակարգերով, որոնք առկա էին նախկին «Էյր Ֆորս Ուան»-ում։