Իսպանիայում անտառային հրդեհի զոհերի թիվը հասել է 11-ի․ որոշների մարմիններ հայտնաբերվել են մեքենաներում

Իսպանիայի հարավում՝ Ալմերիա նահանգում բռնկված խոշոր անտառային հրդեհի հետևանքով առնվազն 11 մարդ է զոհվել։ Տեղական իշխանությունների տվյալներով՝ զոհերից մի քանիսի մարմինները հայտնաբերվել են մեքենաների մեջ՝ Բեդար բնակավայրի շրջանում։

Հրդեհաշիջման աշխատանքներին ներգրավվել է շուրջ 150 հրշեջ, ինչպես նաև հինգ հրշեջ հաշվարկ։ Կրակը բռնկվել է այն ժամանակ, երբ օդի ջերմաստիճանը մոտեցել էր 40 աստիճան Ցելսիուսի, ինչի հետևանքով այն շատ արագ տարածվել է։

Հրդեհի պատճառով փակվել են մի շարք ճանապարհներ, իրականացվել է բնակիչների տարհանում, իսկ մոտ 50 մարդ ժամանակավորապես տեղավորվել է տեղական մշակութային կենտրոնում։

Նախնական տվյալներով՝ տուժել է առնվազն 6 մարդ։ Նրանց թվում են այրվածքներ ստացած մի կին և ծխից թունավորված մեկ անձ, որոնք տեղափոխվել են հիվանդանոց։

Ականատեսների վկայությամբ՝ հրդեհը կարող էր սկսվել էլեկտրահաղորդման գծի ընկնելու հետևանքով, ինչից բռնկվել է չոր բուսականությունը և կրակը արագ տարածվել հարակից անտառային տարածքներով։ Սակայն հրդեհի պատճառի վերաբերյալ պաշտոնական հաստատում դեռևս չկա։

Տարածաշրջանային արտակարգ իրավիճակների ծառայության ղեկավար Անտոնիո Սանսը տեղի ունեցածը բնութագրել է որպես «աննախադեպ ողբերգություն»՝ ընդգծելով, որ մարդկային այս կորուստը չափազանց ծանր է։

Վերջին տարիներին Իսպանիան ավելի հաճախ է բախվում երկարատև շոգ եղանակի, երբ օդի ջերմաստիճանը գերազանցում է 40 աստիճանը, ինչը զգալիորեն մեծացնում է խոշոր անտառային հրդեհների վտանգը։