Դատախազությունը պահանջում է պետությանը վերադարձնել Բնապահպանության նախկին նախարար Արամ Հարությունյանի տնօրինության տակ գտնվող հողատարածքը

Հակակոռուպցիոն դատարանը վարույթ է ընդունել Գլխավոր դատախազության հայցը, որով պահանջվում է պետությանը վերադարձնել Բնապահպանության նախկին նախարար Արամ Հարությունյանի ապօրինի տիրապետության ներքո գտնվող 0,8 հա մակերեսով հողատարածքը։

Դատախազությունը պահանջում է անվավեր ճանաչել Դիլիջան քաղաքի Մաքսիմ Գորկու փողոցի 29/24 հասցեում գտնվող հողամասի 2012 թվականի աճուրդը, ինչպես նաև Արթուր Արշակյանի և Արամ Հարությունյանի միջև 2017 թվականին կնքված առուվաճառքի պայմանագիրը և կիրառել անվավերության հետևանքներ։

Դատարանը նաև կիրառել է հայցի ապահովման միջոց՝ արգելելով Արամ Հարությունյանին կատարել այնպիսի գործողություններ, որոնք կարող են փոխել հողամասի փաստացի կամ իրավական կարգավիճակը։

Գլխավոր դատախազության ուսումնասիրությամբ պարզվել է, որ խոսքը բնության հատուկ պահպանվող տարածքների շարքին դասվող «բնապահպանական անտառ» գործառնական նշանակության հողի մասին է, որը, ըստ օրենքի, չէր կարող օտարվել ֆիզիկական անձանց։