Փաշինյանի հայտարարությունները չեն կարող դիտվել որպես հրահանգ. Դատավոր Դոլմազյան

Հակակոռուպցիոն դատարանի դատավոր Վահե Դոլմազյանը արձագանքել է լրագրողի հարցին՝ կապված վարչապետ Նիկոլ Փաշինյանի հայտարարությունների հետ Սամվել Կարապետյանի վերաբերյալ գործի ֆոնին։

Լրագրողի հարցին, թե արդյոք վարչապետի՝ «Սամվել Կարապետյանը պետք է նստի» ձևակերպումը կարող է ճնշում դիտվել գործը քննող դատավորի վրա, Դոլմազյանը նշել է, որ նման հայտարարությունները չեն կարող համարվել հրահանգ։

«Երկրի ղեկավարը, տարբեր հանգամանքներով պայմանավորված, կարող է տարբեր քաղաքական հայտարարություններ անել։ Չի հրահանգում, քանի որ յուրաքանչյուր դատավոր կոնկրետ գործը քննում է կոնկրետ հանգամանքները և քրեադատավարական իրադրությունը հաշվի առնելով»,– ասել է նա։

Դատավորը հավելել է, որ դատավորներն իրենց լիազորությունները ստանձնելիս երդվում են անկախ գործել՝ անկախ նրանից, թե ով է մեղադրյալի աթոռին։

Վահե Դոլմազյանը նաև նշել է, որ նույն կերպ է աշխատել ինչպես նախկինում՝ քննիչ և դատախազ եղած տարիներին, այնպես էլ այժմ՝ դատավորի պաշտոնում։