«Ես ոչ մեկի փեսան չեմ, 27 տարի դատավոր եմ»․ Սևակ Համբարձումյան

ՀՀ վերաքննիչ քրեական դատարանի դատավոր Սևակ Համբարձումյանը լրագրողների հետ զրույցում անդրադարձել է իր վերաբերյալ հնչող հարցերին ու դատական համակարգի վերաբերյալ գնահատականներին։

Լրագրողները հետաքրքրվել են, թե ում «փեսան է» Սևակ Համբարձումյանը և ինչպես է դարձել դատավոր։

Ի պատասխան՝ նա ընդգծել է իր երկարամյա փորձը՝ նշելով, որ արդեն 27 տարի է աշխատում է դատավորի համակարգում։

«Ես ոչ մեկի փեսան չեմ, 27 տարի դատավոր եմ»,– ասել է Համբարձումյանը։

Նրա խոսքով՝ դատական համակարգը իդեալական չէ, ինչպես և ցանկացած այլ համակարգ, սակայն տարիների ընթացքում հազարավոր օրինական և հիմնավորված դատական ակտեր են կայացվում։

«Դա ես չեմ կարծում, թե կոռուպցիայի արդյունքում են, հակառակ դեպքում համապատասխան գնահատականի կարժանանար»,– նշել է նա՝ անդրադառնալով կոռուպցիայի վերաբերյալ հարցերին։

Դատավորը հավելել է, որ խնդիրներ ունեցող դատավորներ կարող են լինել, սակայն դա չի նշանակում, որ համակարգը որպես ամբողջություն կոռումպացված է։ Նրա խոսքով՝ անհրաժեշտության դեպքում նման դեպքերով պետք է զբաղվեն համապատասխան մարմինները։

Սևակ Համբարձումյանի գնահատմամբ՝ ընդհանուր առմամբ հասարակության մեծ մասը դժգոհ չէ դատական համակարգից, թեև առանձին դեպքերում քաղաքացիները կարող են չհամաձայնել որոշ դատական ակտերի հետ։

Նա նաև նշել է, որ իր կարծիքով վերջին տարիներին՝ հատկապես 2018-ից հետո, դատական համակարգում որոշակի բարելավումներ են արձանագրվել։