Պուտինին դիմած և սպառնալիքներ հնչեցրած զինվորը ձերբակալվել է. մանրամասներ

Ռուս զինվոր Ալեքսանդր Լունինի (Պուստովալով) տանը խուզարկություն է իրականացվել։ Այդ մասին հայտնել է նրա կինը, որը նախկինում հրապարակել էր Վլադիմիր Պուտինին ուղղված տեսաուղերձ, որտեղ բողոքում էր ռուսական բանակում կտտանքների և շորթման դեպքերից։

Նրա խոսքով՝ գիշերը ոստիկանությունը այցելել է իրենց բնակարան և առգրավել` ֆլեշ կրիչներ, համակարգիչներ, նոութբուքեր, կոշտ սկավառակ, նունչակներ։

Կինը TikTok-ում հրապարակել էր կատարվածի մասին տեսանյութ, սակայն ավելի ուշ այն ջնջել է։ Հետագայում նա սոցիալական ցանցերում գրել է, որ Ալեքսանդրը խնդրել է իրեն «առայժմ որևէ տեղեկատվություն չհրապարակել, հարցազրույցներ չտալ և մեկնաբանություններին չպատասխանել»։

Լունինի հրապարակած տեսանյութը 24 ժամից էլ պակաս ժամանակում դիտել է 11 միլիոն մարդ, որոնցից շատերը հայտնել են իրենց աջակցությունը զինվորին։ 

Ավելի ուշ Ալեքսանդրը հայտարարել է, որ իրեն հրավիրել են Մոսկվա՝ «իր մտահոգությունները բարձրաձայնելու համար»։ Սակայն նրան հրավիրել է ոչ թե Վլադիմիր Պուտինը կամ նրա ներկայացուցիչները, այլ կրեմլամետ ակտիվիստ Վիտալի Բորոդինը, որը հայտնի է հասարակական և մշակութային գործիչների մասին տեղեկություններ տրամադրելով։ Լունինը համաձայնել է առաջարկին և մեկնել Մոսկվա։ Այդ պահից հետո նա սոցիալական ցանցերում այլևս որևէ հրապարակում չի կատարել։

Լունինը ձերբակալված է արդեն 11 օր։ Այդ մասին տեղեկություն է հրապարակվել նրա Telegram ալիքում։ Լրատվամիջոցները նաև հրապարակել են Լունինի կնոջ անձնական նամակագրությունը, որտեղ նա հաստատում է ձերբակալությունը։