Հորմուզի նեղուցում իրավիճակը դուրս է գալիս վերահսկողությունից․ ինչ է որոշել Մեծ Բրիտանիան

Մեծ Բրիտանիայի ծովային առևտրային գործառնությունների գործակալությունը (UKMTO) Հորմուզի նեղուցում վտանգի մակարդակը հասցրել է «զգալի» աստիճանի: Որոշումը կայացվել է առևտրային նավերի վրա կատարված վերջին հարձակումներից հետո։ Մասնավորապես, «Master of Tanker» նավը հայտնվել է անհայտ արկի թիրախում, ինչի հետևանքով վնասվել է կառավարման խցիկը: Անձնակազմի շրջանում տուժածներ չկան, շրջակա միջավայրին հասցված վնաս նույնպես չի գրանցվել։

UKMTO-ն նավաստիներին նախազգուշացրել է նեղուցում առկա ծովային ականների մասին և հորդորել պատրաստ լինել տրանզիտային երթուղիներում հնարավոր կուտակումներին։ Ներկայումս էներգակիրների փոխադրման համար ռազմավարական նշանակություն ունեցող այս ջրային ուղում ընթանում են ականազերծման աշխատանքներ, ինչով պայմանավորված՝ տարածքում ավելացել է ռազմական նավերի ներկայությունը։

Իրավիճակի սրումը հաջորդել է Իրանի և ԱՄՆ-ի միջև ռազմական բախումներին: Ավելի վաղ ԱՄՆ Կենտրոնական հրամանատարությունը (CENTCOM) հայտարարել էր իրանական հրթիռների, անօդաչու թռչող սարքերի պահեստներին և ռադարային կայաններին հասցված ավիահարվածների մասին։ Ըստ ամերիկյան կողմի՝ դա պատասխան էր Սինգապուրի դրոշով ընթացող «M/V Ever Lovely» բեռնատար նավի վրա Իրանի կողմից կատարված ԱԹՍ-ի հարձակմանը։

Թեհրանն, իր հերթին, Վաշինգտոնին մեղադրել է հրադադարի համաձայնագիրը խախտելու մեջ: Իրանի խորհրդարանի ազգային անվտանգության հանձնաժողովի ղեկավար Էբրահիմ Ազիզին հայտարարել է, որ ամերիկյան հարվածները վկայում են բանակցային սկզբունքներին չհետևելու մասին։ Դրանից հետո Իսլամական հեղափոխության պահապանների կորպուսը հայտնել է տարածաշրջանում ամերիկյան ռազմական օբյեկտներին հասցված պատասխան հարվածների մասին։ Միևնույն ժամանակ, Բահրեյնի արտաքին գործերի նախարարությունը դատապարտել է սեփական տարածքի հրետակոծությունը՝ դրանում մեղադրելով իրանական կողմին և նշելով, որ հարձակումները սպառնալիք են անվտանգության համար: