Սիսիանի «Մայիսի 28» զբոսայգու ևս մեկ հողամաս վերադարձվել է համայնքին

Սյունիքի մարզի դատախազության նախաձեռնությամբ Սիսիան համայնքի «Մայիսի 28» զբոսայգու տարածքում գտնվող ևս մեկ հողամաս վերադարձվել է համայնքի տիրապետմանը։

Դատախազությունից հայտնում են, որ պետական և համայնքային շահերի պաշտպանության շրջանակում ուսումնասիրվել են զբոսայգու տարածքում գտնվող հողամասերի տրամադրման վերաբերյալ փաստաթղթերը։ Արդյունքում պարզվել է, որ 0,0402 հա մակերեսով հողամասը կառուցապատման իրավունքով հատկացվել է ֆիզիկական անձի՝ օրենքի պահանջների խախտմամբ։

Խախտումը վերացնելու նպատակով դատախազը միջնորդագիր է ներկայացրել Սիսիան համայնքի ղեկավարին՝ 2011 թվականի ապրիլի 30-ին համայնքի և կառուցապատողի միջև կնքված պայմանագրով տրամադրված կառուցապատման իրավունքը դադարեցնելու ուղղությամբ միջոցներ ձեռնարկելու համար։

Ձեռնարկված միջոցառումների արդյունքում 2026 թվականի հունիսի 19-ին Կադաստրի կոմիտեում դադարեցվել է նշված հողամասի նկատմամբ գրանցված կառուցապատման իրավունքը։ Հողամասի շուկայականին մոտարկված կադաստրային արժեքը կազմում է 754 հազար դրամ։

Այսպիսով, Սիսիան համայնքի «Մայիսի 28» զբոսայգու տարածքում գտնվող հերթական հողամասը վերադարձվել է համայնքի տնօրինմանը։