Ադրբեջանից Հայաստան է արտահանվել ցորենի և նավթամթերքի հերթական խմբաքանակը

Ադրբեջանական լրատվամիջոցները հայտնում են, որ Բալաջարի կայարանից դեպի Բյոյուք-Քյասիք ուղղությամբ ճանապարհվել է դիզելային վառելիքով բեռնված 17 վագոն, որոնց ընդհանուր քաշը կազմում է մոտավորապես 1000 տոննա։

Դրան զուգահեռ, Ադրբեջանի տարածքով իրականացվել է հերթական մատակարարումը Ռուսաստանից Հայաստան։ Բալաջարի կայարանից Բյոյուք-Քյասիքի ուղղությամբ ուղարկվել է ցորենով բեռնված 18 վագոն, որոնց քաշը կազմում է 1260 տոննա։

Հիշեցվում է, որ մինչև օրս Ադրբեջանից Հայաստան արտահանված դիզելային վառելիքի քանակը գերազանցում է 13 հազար տոննան, իսկ ԱԻ-92 և ԱԻ-95 տեսակի բենզինի ծավալը՝ 4 հազար տոննան։

Նշվում է նաև, որ առ այսօր Ռուսաստանից Հայաստան՝ Ադրբեջանի տարածքով անցնող տարանցմամբ տեղափոխվել է ավելի քան 32 հազար տոննա հացահատիկ, 7 հազար տոննայից ավելի պարարտանյութ, 133 տոննա ալյումին, 68 տոննա հնդկացորեն և 414 տոննա անտրացիտ (ածուխ)։