Հենրիխ Մխիթարյանը ծրագրում է ևս մեկ տարի խաղալ

Միլանի «Ինտերի» կիսապաշտպան և Հայաստանի ֆուտբոլի ազգային հավաքականի նախկին ավագ Հենրիխ Մխիթարյանը հայտնել է, որ չի պատրաստվում կանգ առնել կես ճանապարհին և հույս ունի եվրոպական բարձր հարթակում հանդես գալ ևս մեկ տարի։

Մարզական մեկնաբան Գևորգ Մալաքյանին տված հարցազրույցում ֆուտբոլիստն այս մասին բացահայտում է արել։ Իր հարազատ «Փյունիկ» ակումբ այցելության ժամանակ 37-ամյա խաղացողն անկեղծացել է կարիերայում ունեցած հոգեբանական բարդությունների, ընտանիքի կողմից տրվող մեծ ոգեշնչման մասին և ընդգծել, որ ցանկանում է պրոֆեսիոնալ ֆուտբոլից հեռանալ միայն բարձր նոտայով։ «Այն երիտասարդները, ովքեր որ մինչ այսօր ինձ հետևում են, իմ տղան, հայրս, ընտանիքս, ինչո՞ւ եմ դա ասում, որովհետև ես ինձ թույլ չեմ կարող տալ կանգնել ճանապարհի կեսին, չավարտել այն ամենը, ինչ սկսել եմ։ Ցանկություն ունեմ ավարտել բարձր նոտայով և հույս ունեմ, որ դեռ մեկ տարի էլ կխաղամ, որից հետո արդեն պարզ կերևա»,- նշել է նա։

Մխիթարյանի համոզմամբ՝ ֆուտբոլային աշխարհում հաջողության են հասնում ոչ թե սոսկ երազողները, այլ քրտնաջան աշխատանքի պատրաստ մարդիկ։ Նա շեշտել է, որ առանց կարգապահության ու աշխատասիրության տաղանդը չի կարող արդյունք ապահովել։ «Չկա տաղանդ առանց կարգապահության և չկա կարգապահություն առանց աշխատասիրության։ Եղել են կասկածներ, նույնիսկ հիասթափություններ են եղել, բայց դրանք տևել են ընդամենը մի քանի ժամ, երևի՝ մաքսիմում մեկ օր, առավելագույնս, որից հետո իմ մեջ մեծ ուժ եմ գտել, փորձել եմ ինքս ինձ համոզել, որ այն ինչ տեղի է ունենում, դա զուտ մի պահ է, պետք է ամեն ինչ անել, որպեսզի այդ հիասթափությունը դառնա հաջողություն»,- ասել է նա։

Լրատվամիջոցները մայիսի վերջին տեղեկացրել էին, որ Մխիթարյանը համաձայնության է եկել ակումբի հետ նոր պայմանագիր կնքելու հարցում։ Հունիսին «Ինտեր» ֆուտբոլային ակումբի մարզական տնօրեն Պիերո Աուզիլիոն անուղղակիորեն ակնարկել էր, որ հայ ֆուտբոլիստը կշարունակի իր պրոֆեսիոնալ ելույթները իտալական ակումբի կազմում։