Ռոնալդինյոն վերադառնում է մեծ ֆուտբոլ

Բրազիլիայի ազգային հավաքականի, «Բարսելոնայի» և «Միլանի» լեգենդար նախկին հարձակվող Ռոնալդինյոն պայմանավորվածություն է ձեռք բերել իտալական Սերիա C-ն ներկայացնող «Ռավեննա» ակումբի հետ։

46-ամյա բրազիլացի ֆուտբոլիստի վերադարձի մասին տեղեկացնում է Gazzetta dello Sport պարբերականը։ Գործակցության մասին պաշտոնապես կհայտարարվի հունիսի 23-ին Մայամիում կայանալիք հատուկ միջոցառման ժամանակ, որտեղ նաև ցուցադրվելու է թիմի նոր մարզահագուստը։

«Նոր գույներ, նույն ժպիտը։ Անհամբերությամբ եմ սպասում այն պահին, երբ կրկին կսկսեմ հրաշքներ գործել գնդակով և նոր պատմություն կկերտեմ Ինյացիո Չիպրիանիի ու նրա ողջ ընտանիքի հետ։ Ֆուտբոլն ինձ միշտ ուրախություն է պարգևել, և ես ցանկանում եմ այդ ոգով կիսվել «Ռավեննայի» հետ»,- նշել է Ռոնալդինյոն։

Ակումբի նախագահ Ինյացիո Չիպրիանին այս տեղափոխությունը բնութագրել է որպես «անհավանական իրադարձություն» իտալական ֆուտբոլի ողջ համակարգի համար։ Ակնկալվում է, որ 2002 թվականի աշխարհի չեմպիոնը թիմին կմիանա նախամրցաշրջանային հավաքի ընթացքում և նոր մրցաշրջանի պատրաստության առաջին իսկ օրերից հասանելի կլինի մարզչական շտաբին։

Նախորդ մրցաշրջանում «Ռավեննան» մոտ է եղել դասակարգման բարձրացմանը, իսկ այժմ, իր կազմում ունենալով 21-րդ դարի ամենավառ ֆուտբոլիստներից մեկին, նպատակադրվել է պայքարել Սերիա B-ի ուղեգրի համար։ Չնայած մարտին լրացած 46 տարիքին՝ Ռոնալդինյոն լիովին պատրաստ է վերստին փորձել ուժերը պաշտոնական խաղերում։