Սահմանամերձ բնակավայրերի բնակիչների համար լավ լուր․ կառավարության նոր որոշումը

 ՀՀ կառավարությունն ընդունել է որոշում, որով ավելացվել է սահմանամերձ բնակավայրերում բնակարանային մատչելիության պետական աջակցության ծրագրի ֆինանսավորումը։ 

Որոշման ընդունումը պայմանավորված է նրանով, որ ծրագրի շահառուների թիվն աճել է։ Ծրագրից օգտվողների թիվը 2400-ից ավելացել է ևս 1170-ով։ Միաժամանակ դիմումների ընդունման ժամկետը երկարաձգվել է մինչև 2027 թվականի դեկտեմբերի 31-ը։

Լրացուցիչ շահառուների ֆինանսավորումն ապահովելու համար կառավարությունը վերաբաշխել է միջոցներ 1098 «Բնակարանային ապահովում» ծրագրի շրջանակներում։ Գումարները հատկացվել են մեկ միջոցառման տնտեսված միջոցներից և ուղղվել սահմանամերձ բնակավայրերի բնակարանային աջակցության ծրագրին։

Արդյունքում ծրագրի ֆինանսավորումը տարեկան կտրվածքով ավելացվել է 1 մլրդ 397.5 մլն դրամով։ Առաջին կիսամյակի համար ավելացվել է 100 մլն դրամ, իսկ ինը ամսվա համար՝ 516 մլն դրամ։

Ընդունված որոշումը հնարավորություն կտա պետական աջակցություն տրամադրել բոլոր նոր շահառուներին և շարունակել սահմանամերձ բնակավայրերում ընտանիքների բնակարանային պայմանների բարելավմանն ուղղված ծրագիրը։